無綫新劇《學警出擊》前晚在西環街頭拍攝黑幫大集會場面，動用了三架警車及一架衝鋒車，由於場面逼真，吸引了約半百市民圍觀。飾演黑幫頭子的謝天華一身白馬王子look拍攝，與扮演警員的陳鍵鋒和吳卓羲對峙。
無綫劇集《學警出擊》前晚拉大隊在近西港城附近拍外景，劇情描述飾演黑幫大哥的謝天華，在一間酒樓內進行大集會，身為警務人員的陳鍵鋒及吳卓羲接到線報趕往現場視察。
同三哥爭海味
攝製隊於酒樓門外停泊了約六至七架私家車，還有三架警車及一架衝鋒車，由於場面逼真，吸引了約半百街坊駐足看熱鬧。當黑幫頭子謝天華一身白衫白褲造型出現，有街坊大讚他型仔，謝天華笑說：「扮黑社會人物成熟啲好，以前我個樣細個，拍呢啲戲只係做細嘅，成日俾人點，𠵱家做大佬可以點番人。」
謝天華在劇中與周海媚（海味）有一段情，但海味又與苗僑偉（三哥）有感情線，記者取笑謝天華勾義嫂，他笑說：「感情啲嘢好難講，唔係勾義嫂嘅！」
扮演警員的陳鍵鋒則表示要操弗身形，他說：「我喺劇中有好多高難度場面，好似要跳海，而且有啲戲要教人游水，我要操弗啲身形，已經減咗10磅，唔知使唔使着泳褲，淨係操上身都夠，下身冇得操。我𠵱家150磅，有4嚿腹肌，我想keep到有6嚿就好！」
吳卓羲做卧底
吳卓羲前晚穿便裝出現，他說：「遲啲會做埋卧底，所以唔使着軍裝，拍呢套劇成日要開槍，公司都幫我哋領咗槍牌。」他在劇中與江若琳有感情線，他表示不擔心傳緋聞。早前他去了內地拍戲，他苦笑說：「去咗三個月拍戲，又凍又冇啖好食，結果瘦咗返嚟，一個人喺嗰度好寂寞，之前過年我一個人打邊爐咋！」
採訪：楊潔雯
攝影：陳慧安