喺無綫有卡拉之星稱號嘅王俊棠，噚日同相識廿載嘅女友吳嘉莉（Susan）共諧連理，喺九龍維景酒店舉行婚禮，圈中好友八両金、喬寶寶、寶珮如、鄧英敏等都嚟祝賀一對新人，儀式進行前王俊棠緊張到掌心出汗，但仍不忘演唱獻技，佢唱一曲《遲來的愛》表愛意，迎接太太進場，新郎哥未知係咪太緊張，唱歌時有啲走音，其後徇眾要求互咀幾次，溫馨動人。
王俊棠太太Susan喺台上話：「王師奶呢份工一啲都唔易做，試用期咁長先被錄用，會好好珍惜。」王俊棠就話：「太太令我改變好多，以前只可以用三個字—乞人憎嚟形容自己，𠵱家唔同晒。」究竟王俊棠點樣打動太太芳心？Susan話：「佢靜雞雞去買戒指畀我囉，我都考慮咗一陣㗎。」太太婚後會唔會做全職家庭主婦，王俊棠笑笑口話：「太太梗係會繼續工作，你知啦，無綫搵到幾多錢呀，都要靠佢喺外面工作。」
想生個女
王俊棠已經有個仔十幾歲，佢話：「囝囝同Susan相處好好，完全冇問題。」不過佢都渴望同Susan可以生個女，所以大家已經有共識順其自然。
另外，鄧英敏同王俊棠相識十載，噚日義務為一對新人擔任司儀同協助打點，鄧英敏仲送上水晶擺設，寓意永恒。
