Blogpaper：愛菲林的傻瓜

科技數碼化，菲林機被取代係理所當然。菲林不死，唔一定係因為死硬派。儘管人人習以為常，都會懷念那既陌生又熟悉的久違感覺。愛儍瓜機扮嘢？影一次，手執一張菲林相片，你會完全明白那戀舊的理由。

攝影：林栢鈞

網址：http://appleblogpaper.blogspot.com

aboutme:
fluffy

周圍逛、周圍蕩是我的嗜好。從來不怕人生苦短，只怕成世人流流長兩腳一伸，沒任何值得回憶的畫面，一直堅守嘆盡、嚐盡、玩盡這人生三大目標。一世勞碌只為銀行的幾個數字才是大笨蛋，寧花盡一分一毫，也不願使剩半角三仙入棺材。

去夜冷舖買儍瓜機

人人都已轉用數碼機，乜人會用菲林？「懶型嗰堆囉！」Lomo、HOLGA被塑造成了潮機，仲用儍瓜機影菲林，霎時間變成了有生活品味。早兩日攝影師朋友阿鈞送我一張照片，原來係我於半年前被佢偷影的。相片吸引之處，是菲林的粗糙感、角度的自然隨意，沒有高科技的造作修飾，也許這就是真正的SnapShot，一陣驚喜激發了我玩儍瓜機的衝動。
要玩儍瓜機，第一時間諗起擁有大概200部儍瓜機的朱Sir。朱Sir任教於觀塘職訓攝影系，不過講到好玩的相機，佢最愛儲冇對焦、冇得調校快門同光圈等攝技的儍瓜機。去到佢Office，他興奮地從膠箱一部一部抽出來，針孔機、寶麗萊、多格菲林機、可愛卡通相機仔都有。朱Sir：「儲咗咁多年，以前就容易買，𠵱家通常都係上網Bid或者去夜冷舖搵。冇話邊間特別多，行經夜冷舖都會走入去睇，鴨寮街最多，但多數都係二手。想買平貨，除咗夜冷舖，仲有外國嘅跳蚤市場、日本雜貨店碰運氣。」

■想儲儍瓜機一定要有恒心，朱Sir每次經過夜冷舖都必入，耐心死摷。

香港針孔相機做手信

朱Sir掃機絕對係豐儉由人，見到一百幾十的一定買咗先講。上兩星期先在對面小販檔，用$20買了部明知用唔到的舊款寶麗萊。儍瓜機有兩大類，玩外形同玩功能。外形越搶眼搞鬼當然越受歡迎，至於功能就多以聲響、多格快門拍攝、魚眼鏡及潛水為主。朱Sir差不多種種有齊，其中4格儍瓜機可算係Lomo的前身。「當年多格快門相機有2、4、8、16格4種，好多經已停產。之後Lomo收購4格相機重新包裝推出，帶起咗熱潮。但由於4格相機嘅公司太多，佢收購唔晒。所以有好多牌子都可以搵到公司跟風生產。」其實唔一定來佬貨先係正貨，因為大部份儍瓜機都係香港同大陸生產，所以有一定生產技術。「香港唔止識欣賞嘅人多，佢哋仲身體力行設計咗好多舊款LowTech機。好似設計同生產都係由香港人一手包辦嘅ZeroImage，專出柚木針孔機，質素都唔錯。最近就買咗呢部Zero2000。」Classic外形咁討好，我即刻想買部送畀日本朋友，香港手信又點止奇華呢。

■土產ZeroImage所出的柚木針孔機，效果一樣出眾。

菲林終有一日被取代

要數玩菲林機的佼佼者，日本絕對第一，日本雜誌經常推出專輯介紹菲林機，當中最出名的是《大人之科學》，《大人》並非攝影雜誌，但會不定期推出相機專題，有時更附送儍瓜機，用簡單科學/光學原理解釋攝影。講得興致勃勃之際，朱Sir卻輕輕慨嘆：「菲林終有一日被數碼取代㗎喇！」剛剛先講到菲林如何獨特，點會呢？「𠵱家都開始有公司生產啲LowTech設計嘅數碼相機仔，效果同儍瓜機好似！韓國啱啱新出咗一部BellHowellGenieIII，仲好受歡迎。」上網睇完Bell仔影相出來的效果，我的確心動入貨。決定買的一刻，忽然覺得我有份將菲林推向末路，唔知這一點掙扎係咪太儍呢？

■《大人之科學》第3及14期曾送上儍瓜機，大家有興趣擁有，可以嘗試補訂。

■多格菲林機係大熱儍瓜機類型，Nike都曾經出過一部。

■菲林咁大的相機仔係朋友去加拿大買回來的手信。