一位朋友突然問起，請左丁山畀吓意見。朋友講及邵新明不久前在《蘋果》評論版評論他信，順便踩埋泰國教育制度，大彈泰國教育水平低，學生無創意等等。朋友問左丁山識唔識回應邵新明呀？
嘩，左丁山點能同邵新明比較呀。邵老哥學貫中西，一早在投資市場大有斬獲，退出財金界，呢十幾年來去完哈佛研究滿洲話，又去牛津大學做訪問學人，生活優游之餘，博覽羣書，其識見之廣，世界視野之闊，遠非左丁山呢類特區土長井底蛙所能及，邊度敢有回應。之不過，咁啱左丁山去過泰國無數次，去過哈佛只有兩次（睇吓圖書館咋），去過牛津零次，所以講哈佛牛津就唔敢班門弄斧嘞，講泰國就可以噏幾句。
中貿林有位住在泰國嘅死黨K，從事基建策劃。基建K在中大畢業後，攞洛克菲勒獎學金去曼谷法政大學讀經濟學碩士，跟住追咗一位朱拉隆功大學女生，結婚後回港，跟住去咗紐約工作，然後回歸泰國，至今多年，生下兩位女兒，一位在布朗大學讀博士，一位在WakeForest（馬刺隊主將鄧肯嘅母校）讀醫學院。話基建K係正牌泰國通，並不為過。聽基建K講得多，泰國學制係三三四學制，中學生在高中三考全國公開試，憑成績申請入大學。大概最叻嗰幾千人一定係讀醫、理、工學院，之後係法、商、社學院，前一批入朱拉隆功，後一批入法政大學，有錢仔女就去英美留學，泰國學生啲英文係水皮啲，但創意絕對唔低，每年廣告界頒發「奧斯卡」金帆獎之時，左丁山就曾經見到好多來自泰國嘅廣告宣傳片攞大獎，廣告界公認泰國廣告人創意無窮。佢哋嘅宣傳避孕與防避愛滋病手法，係香港人唔敢學㗎，好多年前就有一位仁兄舉辦學生吹避孕袋比賽，大收宣傳之效。基建K好幾年前帶左丁山去一間園林餐廳食泰國菜，餐廳叫做CabbagesandCondoms，入面有各種不同類型嘅避孕袋產品銷售，十分自由開放。泰國最大問題係貪污傳統，軍人官僚各有辦法斂財，無法禁絕，故此阻慢進步速度，但唔可以話他信與軍人不肖，而批評泰國教育一文不值嘅。