小馬哥大勝，好多香港人都好開心。梗係啦，話晒小馬哥喺廣華醫院出世，同香港都有少少淵源。小馬哥人氣急升，有啲人就想叨吓佢光，民建聯副主席葉國謙噚日出席香港道教節活動，被問到對小馬哥當選嘅意見時，就自爆自己同呢位候任台灣總統都有一段淵源，點解？
阿謙解釋，因為大家都係喺廣華醫院出世囉！不過佢細小馬哥一歲、51年出生，但都感覺份外親切。照咁推論，所有廣華出品，咪都同小馬哥有關係？
阿謙仲話，02年小馬哥選台北市長時，佢都有去台灣觀戰，仲同小馬哥傾偈，覺得佢好nice，又讚不絕口話小馬哥態度比較溫和，可以促進兩岸溝通，認真政治正確。