已經退休大半年嘅嶺南大學前校長陳坤耀有新動向，八方聽聞最近有份新工等緊佢。陳校長好友同八方講，《信報》有意邀請陳坤耀做特別顧問，負責就改革《信報》提意見，最高指示希望可以將該報辦成港版《金融時報》、《華爾街日報》，有更大政治影響力。
陳校長曾任報評會主席，對報業運作有認識，佢會令《信報》有咩新面貌，八方拭目以待。《信報》高層文灼飛向八方講，佢哋有意請陳坤耀協助改革，如果陳校長首肯，將會就《信報》同《信報月刊》內容提意見，但只屬兼職性質。佢又話《信報》創辦人林生、林太同陳校長夫婦好熟，今次打人情牌先可成事，正靜候陳校長回覆。