香港電台前景不明，有好路數者紛紛逃亡跳船，難怪連台長都咁難請人。港台最近又出招聘廣告，入職者學歷要求仲高過請台長，應徵者必須有學位資格，港台有邊個職位仲勁過台長，一定要請大學畢業生呢？
呢個學歷要求比台長仲高嘅職位係系統分析員，職責係為入門網站同網上廣播站蒐集用戶需求、系統分析、設計、編碼、測試，仲要喺質素保證上為整個開發過程提供支援，並且要提供系統支援同使用者訓練，似乎都幾多嘢做。
呢個係一年合約職位，學歷要求要持有香港嘅電腦學、電腦科學、資訊科技或相關學科學位，或具同等學歷，最少五年相關工作經驗，月薪視乎工作經驗，由24,000幾蚊至26,500幾蚊。八方問過一啲資訊科技界人士，有人指薪金水平屬市價，不過近排資訊科技界都幾好景，港台呢個職位係一年合約制，未必吸引到叻人轉工，唔知遲啲使唔使降低入職門檻呢又？