北京官員今日會飛去希臘，進行採摘奧運聖火儀式。講京奧離不開討論中國人權，一班關注中國人權狀況同推動民主嘅團體，噚日就搶頭啖湯，向港人同埋內地同胞，發起「人權聖火」傳遞活動。
要人權訊息遍地開花
當然，「人權聖火」梗係冇可能好似奧運聖火咁堂堂正正傳入中國。發起今次活動嘅有成44個團體，佢哋話，睇到早前美國導演史提芬史匹堡以中國未有協助解決達爾富爾問題為由，辭咗北京奧運藝術顧問一職，激到北京官員紮紮跳。今次為咗安全起見，佢哋諗到幾條「絕橋」，叫內地嘅自願參加者，即日起可以用傳單、傳真、電郵、CD、DVD、手機短訊，甚至着T恤、戴太陽帽、又或者只係掛黃絲帶……將尊重人權嘅訊息喺內地遍地開花。
「人權聖火」嘅口號係「同樣的世界，同樣的人權」，發起人包括國內民運人士魏京生、王丹同《北京之春》主編胡平等；噚日喺香港有個誓師儀式，華叔同埋長毛梁國雄都有去撐場。發起嘅團體話，「人權聖火」嘅傳遞路線，包括內地一啲人權同維權人士受迫害嘅地方，亦唔少得著名風景區同旅遊景點。