德國Audi喺2008北京奧運會將會成為正式高級用車供應商，到時會喺北京奧運及殘疾人士奧運會舉行期間，出動過千部全新A6L、A8L同Q7，用嚟接載運動員、奧組委同各地嘅貴賓。而Audi香港代理亦會喺香港舉行奧運馬術比賽期間，提供80部全新A6房車接載有關人士。
為慶祝呢項盛事，Audi香港代理就喺啱啱過去嘅周末，舉行名為AudiOlympic嘅車展。場中除展出Audi旗下各車系外，揭幕當日仲請嚟近日復出嘅歌手劉美君擔任嘉賓，佢亦為咗配合車展主題，特別着上一身馬術服飾出席㖭！Audi加奧運，難得的車壇兼體壇盛事，真係值得慶祝喎！
記者、攝影：鄭達基