Hero之終章　一吻謝天下

做英雄，唔一定要學似美劇《Heroes》咁有不死身，你仲記唔記得01年日版《Hero》（律政英雄）中的木村拓哉，唔使打唔使殺，單憑偵探頭腦加上型英外表，除創下日劇史上平均收視最高紀錄外，更憑此片奪下最佳男主角大賞。不過英雄都有遺憾，劇中同松隆子眉來眼去幾年都撻唔着，六年後終於在電影版得米，都話「英雄」難過美人關㗎啦！

記者：洪偉順

螢幕情侶一吻作結

自《悠長假期》加《戀愛世紀》，木村同松隆子呢對螢幕情侶形象深入民心。本周上市的電影版《律政英雄》DVD，07年上畫時與電視版相距六年，35歲的木村「佬味」漸現，松隆子更是歲月不饒人，「熟女」味濃。不過之前11集電視劇加上特別篇《小鎮風雲》，男女主角持續疑幻似真的曖昧關係，始終也沒有交代二人之終極結局，吊盡不少粉絲胃口，所以電影版自然成為大家心目中的「大結局」。
電影版講述六年後男主角久利生再次返回「東京地方檢察廳城西支部」，與一班舊同僚再度共事，卻遇到奇案並以社會公義戰勝貪污權貴。而戲末正是由木村與松隆二人，以彷彿等了很久但又早應發生的一吻作結。當然過程中耍盡情侶花槍，鬥嘴、曖昧行為乜都齊，同電視版一模一樣，餓咗好耐的「律政Fans」睇起來會特別有親切感。

■《律政英雄》的招牌動作，全體一字排開。

■見到呢一吻，等咗多年嘅粉絲真係要開香檳慶祝。

■隔咗六年，木村開始顯老，佬味四射。

■做咗人妻嘅松隆子，依然有吸引力。

■木村的對頭律師松本幸四郎，戲外正是松隆子之父。

電視元素逐一複製

電影版《律政英雄》保留了電視版的精華所在，人物方面一眾檢察官同事如阿部寬、大塚寧寧來自連續劇，中井貴一同綾瀨遙則來自特別篇，連檢察廳的看守員以至木村成日去蒲嗰間酒吧的酒保都依然「健在」。至於主角所在的「東京地方檢察廳城西支部」辦公室，更是根據六年前的場景重新搭建，酒吧St.George'sTavern的面貌也沒走樣。最令人窩心的是，木村在戲中着紅那件過萬元的ABATHINGAPE橙啡色皮面羽絨加RedWing鞋，六年後再度登場，這種親切感已值回票價。唯一商業計算，是加入了《JSA安全地帶》的韓星李秉憲任韓國檢察官，在木村往韓國查案途中對其施予援手。

■依照當年場景重新搭建的檢察官辦公室。

■李秉憲在戲中扮演韓國檢察官。

■最近當新郎的阿部寬，樣子依然無變。

特別篇的中井貴一與綾瀨遙，在電影版中都有出現，但佔不重戲份。

忘了罪大惡極

每套戲都有自己的中心點，亦即是電影帶出的訊息所在，獨立故事的電影版《律政英雄》同樣要傳達畀大家知：法律面前人人平等！而全場最令人感動的地方，係故事主軸講木村主理的殺人案件關連到一宗政府高官貪污案，每個人都只關心貪污的官員，完全忽視殺人者如何罪大惡極；但殺人者奪走了別人的幸福，殺了別人的未婚夫，大家竟孰視無睹得不當作一回事。所以木村在最後一幕，當住所有人指出：「奪走別人幸福的人最可惡！」的確令筆者動容。有時要教人唔好犯罪，不如先叫佢哋諗吓前因後果，呢句都算經典。