電影《我的最愛》演員昨日趁復活節假期到旺角宣傳，主角方力申、鄧麗欣（Stephy）、曾愷玹和楊愛瑾甫出現，即令行人專用區大混亂。雖然新片上畫8日票房收6百多萬，卻有途經的口痕友爆粗大叫「××我唔會睇」。
新片《我的最愛》上畫8日有650萬票房，成績不俗，昨日戲中主要演員方力申、鄧麗欣、楊愛瑾（Miki）和由台灣特地來港一天的曾愷玹（Alice）一同到旺角行人專用區宣傳。四人一現身即吸引大批市民圍觀拍照，四人邊向觀眾派發電影明信片邊簽名，現場情況一度混亂，更有人爆粗。
之後四人轉往附近一間卡拉OK接受訪問，對現場過百人圍觀，小方卻未有出手保護三女，他說：「我搏命做宣傳嘛，佢哋大個女識得保護自己㗎喇。」Stephy聞言即說：「我靠瘦弱嘅fans保護我咋，啲fans話有人摸完我話好滑，不過我就唔覺囉。」至於以白色單薄上衣現身的Miki和透視裝加tubetop打扮的Alice則慶幸未被人博懵。
「好彩唔係鬧我」
提到曾有途人爆粗大叫「××我唔會睇」，揚言不會看《我》片，小方說：「其實旺角咁多人，本來都驚有人借意搞事，呢啲都難免，不過好彩唔係鬧我，同埋宣傳都算順利同熱烈呀！」Stephy對早前演出《勁歌》時被指歌藝有進步，她說：「可能已經犯完太歲啦，之前嘅嘢冇再諗喇，𠵱家會識得放鬆啲，希望大家會見到我嘅進步啦！」
採訪：藍文浩
攝影：陳慧安