麥浚龍（Juno）喺鍾欣桐（阿嬌）捲入淫照事件後仍癡心力撐，日日喺個人網誌上大晒「奴嬌戀」，令阿嬌拍檔蔡卓妍（阿Sa）日前忍唔住寸Juno寫blog寫得含糊，累佢回應到攰。噚日鄭希怡（Yumiko）同鍾舒漫一齊出席大埔舉行嘅復活節潮樂派對時，Yumiko都認同阿Sa所講，佢話：「佢個blog唔止畀fans睇，傳媒日日都有追嚟睇，費事引起不必要嘅揣測啦。」馮仁昭問佢想唔想好似阿嬌咁放大假去小島旅行時，Yumiko就話：「都唔知佢係咪去，可能淨係Juno自己去呢。」
大晒戰利品
雖然俾阿Sa咁話，但Juno一於少理繼續喺blog晒命，好似噚日咁，Juno又以「CharlieBrown&Lucy」為題寫blog，話近日東京潮店Loveless舉行嘅Snoopyexhibition自己亦有留意，仲收到呢個系列嘅T恤同布鞋。不過睇佢post嘅相，對粉紅色鞋好似係女裝款，莫非Juno準備送畀阿嬌？
另外，關智斌（Kenny）噚日出席會展一個活動時，話經理人霍汶希（Mani）因為梁洛施解約嘅事而承受唔少壓力，所以準備約佢食飯開解吓。
