淫片外洩事件早前震撼大學界，中大近排卻發生更騎呢偷竊事件，失物竟然係打印機碳粉盒！中大線人報料，指校園近日貼出通告，提醒員工小心看管碳粉盒，據講呢位騎呢「碳粉大盜」蓄長曲髮、四眼仔，身高約五呎八吋，特徵係成身煙味，作案時會拎住個紅白藍膠袋。
中大消息透露，碳粉大盜做案手法係到中大各學系辦公室，訛稱係電腦公司職員，聲稱上門更換打印機碳粉，職員不虞有詐，結果碳粉盒就唔見咗。中大發言人承認近日最少發生三單碳粉盒失竊案，首先係醫學院辦公室中招，之後兩次輪到崇基學院圖書館。中大話有報警，但未拉到人。中大防盜意識低，除咗唔見碳粉盒，八方聽聞連上堂筆記都有人撻走，有醫學院學生爆料，話近月有個自稱港大醫學院「間諜」男子，喺校園問醫科生攞筆記，聲稱要刺探「軍情」，好彩冇人上當，醫學院院長霍泰輝對校園成日有怪人，見慣不怪。