公民黨前幾日慶祝誕生兩周年後，一眾巨頭就放復活節各有各玩。黨魁余大狀留守香港，同屋企人共敍天倫；袋巾參加完立法會發展事務委員會布拉格考察團後，就轉飛英國探囡囡；湯大狀則選擇去內地嘆世界。
身在西湖嘅湯大狀喺網誌留言，指西湖係一個好迷人嘅地方，唔單止有醉人景色同埋扣人心弦嘅傳說、詩詞同愛情故事，估唔到仲有個好有品味嘅高爾夫球場。湯大狀係golf發燒友，佢對西湖高爾夫鄉村俱樂部球場讚不絕口好正常。
去到西湖，大多數人都會泛舟湖上浪漫吓，湯大狀自然唔會錯過咁有情趣活動，佢話一邊欣賞西湖月色，一邊品嚐杭州美食確係不亦樂乎。湯大狀陶醉喺西湖嘅湖光山色之中，真係恨死冇得返大陸嘅泛民無證議員。