西藏拉薩立立亂，中共唔畀外人隨便入藏，連去西藏附近地區旅行都唔容易。工聯會議員鄺志堅早前報團，打算同太太喺本月尾拍拖去四川海螺溝欣賞冰川同雪山，點知噚日收到旅行社通知，指由於西藏發生騷亂，擔心四川藏民生事，所以當地暫時唔接待旅行團。
鄺大狀話呢個團費用2,500蚊玩足五日，真係抵到爛，去唔成旅行，最麻煩係霎時間唔知轉去邊，事關佢兩公婆好多地方都去過。
鄺大狀早兩年去過西藏，佢覺得有啲喇嘛對漢人唔係太友善，有意去西藏嘅人要小心，若然覺得對方唔多願意就唔好隨便影相，費事惹麻煩。湯大狀遊西湖咁過癮，鄺大狀可以考慮吓喎。旅遊業議會總幹事董耀中話未收到海螺溝暫停接待遊客消息，但提醒市民出發前問清楚，安心啲。