台灣今日大選，好可能有個香港出世嘅人成為總統，相信好多港人都覺得叨到光，飛晒去台灣，希望第一時間直擊「港產」總統誕生。冇去台灣嘅，都有機會喺香港感受吓台式選舉熾熱氣氛，馬英九fans組成嘅香港阿九後援會、蔣公中正香港協會同藍天服務團今日會舉行「馬英九先生勝選中華民國總統慶祝大會」，唔等到開票有最後結果就搶先慶祝。
預早舉行勝選慶祝會
阿九後援會委員蘇建名同八方講，佢哋對小馬哥當選信心十足，所以已經買定香檳，準備為國民黨重新上台執政舉杯，八方聽佢興奮語氣，都感受到台灣選情緊張氣氛蔓延香港。據蘇建名講，香港大約有幾千個泛藍支持者或所謂「自由人士」，大部份合資格選民已到台灣投票，少數人因工作在身或其他原因唔能夠成行，由於大家都好關心選情，急於知道結果，所以佢哋今日下晝3點半，喺粉嶺聯和墟和泰街43號2樓香港番禺同鄉總會會址，舉行馬英九勝選慶祝大會。
蘇建名估計今日大會有幾百人參加，台、港阿九後援會成員亦會透過網絡連線講吓選情，歡迎市民到場，一齊見證小馬哥當選歷史時刻。香港泛藍擁躉對小馬哥當選信心十足，據講已安排今個月28號舉行大型祝捷會，甚至有人已預訂機票，組織觀禮團5月去出席總統就職禮。民進黨執政後，台、港官方交流接近中斷，蘇建名話唔奢望小馬哥可以嚟香港謝票，但希望港府做多啲工夫促進兩地關係，話晒小馬哥都係「港產」，港府唔應該太不近人情。
可往廣華醫院「朝聖」
小馬哥當年喺廣華醫院出世，事隔幾十年當然人面全非，但唔排除有熱情fans去醫院「朝聖」，尋找童年小馬哥嘅足迹，呢個商機如果可以好好把握，話唔定可以創造到另類台港經貿財富。上述慶祝大會地點喺新界區，其實右派團體都有喺市區直播點票情況，香港中山學會喺灣仔浸信會大廈地下有轉播，神州青年服務社就喺旺角行人專區舉行，兩個活動都係下晝5點開始，而以往有直播台灣選舉點票情形嘅光華新聞文化中心今年冇做，據講係因為技術問題，同政治無關。
mailto:[email protected]