上周六，雲集香港最活躍行動主義社運組織和個人的大串連群展《斷估唔拉》在觀塘Osage畫廊開幕，當晚約10時，遠在銅鑼灣的時代廣場，經過連日在廣場就地「野餐」的另一版本藝術自發「斷估唔拉」之後，終於出事，一位小丑打扮的街頭藝人，來到時代廣場賣藝，點知有人報警，多名警員奉命到場將他包圍，話如果佢一收錢就即時拉人，「野餐藝術家」及時到場聲援繼續「野餐」，小丑哥哥頂帽內有錢，但又唔攞得，惟有繼續死撐，僵持不下，終於到了晚上11時許，其中一位「野餐」人士突發奇想，想到一條可以讓各方下台之法，扮其「路不拾遺好市民」，將帽中的打賞錢交畀警察，已經企到腳軟，又唔知點算好嘅警察哥哥，即是省抓，就問小丑：「錢是不是你的？」小丑話係！於是全世界都可以落台，圓滿解決，終於可以返屋企瞓覺。
時代廣場公共空間之爭，其實好戲連場。不過遠在觀塘畫廊內的正牌《斷估唔拉》則還是激進多媒體，社運、文學、藝術跨組織大展，裏面還有黃秋生的激進史呢！
記者、攝影：馮敏兒
《斷估唔拉》
展期：即日至4月13日
地址：觀塘鴻圖道73號建大工業大廈5樓「奧沙．觀塘」
查詢：27934817