上星期日認真忙碌，睇完打吡大賽，本已幾疲倦吓，返到屋企就想瞓一陣，但老婆提醒，賓架P送咗兩張飛嚟，要去文化中心聽倫敦愛樂樂團。哎吔，賓架P叫到，盛情難卻，唯有趕住食碗一番麵，換過件西裝就趕往文化中心。在倫敦聽倫敦愛樂樂團，觀眾穿着十分整齊，香港畢竟係東方城市，英國駐港領事柏聖文眼中之小鎮，聽眾邊有咁講究呀，文化中心內之大劇院與音樂廳，牛仔褲與波鞋T恤係好常見嘅服裝，理得佢係上演歌劇還是幼稚園舉行畢業禮，聽交響樂團還是聽林子祥，好多觀眾嘅服飾都係一樣嘅，波鞋牛仔褲係香港人至愛，由五歲到七十五歲皆如此。
入到音樂廳名人甚多，坐在大堂中座者就有李國寶、梁振英、梁智鴻、唐英年、曾俊華、孫明揚、林瑞麟、邱騰華、夏佳理、陳祖澤、應家柏等大人物，坐後啲嘅有嶺南大學陳校長，是晚演奏會由東亞贊助，唔怪得有咁多名人參加。
對於音樂，左丁山唔在行，只知道倫敦愛樂樂團係世界一流交響樂團，甚為年青嘅首席指揮VladimirJurowski（尤洛夫斯基）係俄國音樂天才，呢晚上半場演奏（一）二十世紀作曲家Mark-AnthonyTurnage嘅EveningSongs，敲擊音樂甚多，左丁山無甚文化，聽到一嚿雲；（二）MauriceRavel之G大調鋼琴協奏曲，係鋼琴家Jean-YvesThibaudet表演時間，彈得徐疾有致，最後一段終曲尤其發揮出澎湃感覺，無怪全場掌聲雷動近五分鐘，鋼琴家要「安歌」。
壓軸節目係俄國作曲家SergeyProkofiev降B大調第五交響曲，成於一九四四年，據節目介紹話係呢位普羅科菲耶夫先生最好嘅交響曲，其他作品大都流於乏味咁講。呢首交響曲節奏明快，十分喧鬧，好倚靠長笛、巴松管與打鼓。據對音樂甚有認識嘅小B講，星期六晚嘅曲目有布拉姆斯與柴可夫斯基（悲愴交響曲）容易惹人好感，保證賣座，第二晚（星期日）之選曲比較有挑戰性，表現出尤洛夫斯基之不甘從俗一面喎。