最近講吓花生浸白醋，惹來大量電郵詢問，足見好多讀者關注血壓高嘅問題。
政府發表「醫療改革諮詢文件」，左丁山揭開瀏覽，搵到第七頁，睇到表1.1，先至明白點解有咁多讀者關心血壓高嘅問題。根據表1.1嘅數字，香港嘅高血壓病患率大增，令左丁山為之一驚：
六十五歲以下：一九九五年係13.7%，二○○三年係20.5%。
六十五歲以上：一九九五年係53.2%，二○○三年係68.8%。
總人口：一九九五年係18%，二○○三年係27.2%。
𠵱家與二○○三年比較，相隔五年，一個合理推測係高血壓病患率比例應該更高，大膽啲講，在二○○八年，六十五歲或以上嘅長者，可能十個人之中就有七個患上高血壓，六十五歲以下嘅，十個人之中就有四個人患上高血壓。高血壓嘅定義係140/90或以上的水平。
香港人口老化，已是不爭事實，而老人中，就有七成機會患上高血壓，好容易隨時出毛病。本來數字未必一定可信，但最近見到Ｋ教授（六十五歲以上）以及秘書Ｖ嘅哥哥（六十五歲以下）差不多時候入醫院做血管手術，當堂唔敢唔信。
食療或吃藥來降低血壓，係治療措施，醫藥費可能幾高吓，入私家醫院做血管手術隨時要十萬八萬元（住大房啫噃），即使買咗醫療保險，亦未必夠保，你話要怎麼辦，怎麼辦？社工教授Ｃ博士話：「預防勝於治療，係普通常識，但從來冇人認真研究如何做好預防。政府嘅醫療開支確實係好大，但幾乎絕大部份用於治療，梗係貴好多啦。嗰份醫療改革諮詢文件猛咁講融資方案，都唔講預防嘅，我好想知道政府用幾多錢去做好防病工作。」
呢個問題好高深，譬如話，左丁山點樣預防他日高血壓呢？睇Ｋ教授嘅例子，食得清淡有足夠運動（游水、太極、行山），已無工作壓力，一樣血管栓塞喎！家庭醫生Ｈ對左丁山講，「同你睇病咁多年，一定要同你講多幾次，平日要做帶氧運動，最好係買多對靚跑鞋做平地緩跑，一定要出一身汗，等血氣運行。游水好難見效㗎！」