唔知係咪呢排印相印得多，屋企部打印機宣佈壽終正寢！話時話，部機都用咗幾年，都係時候換機。不過，巿面咁多新款打印機，唔知點揀好，又要打電話問吓消委會個老友。
老友話，消委會啱啱測試咗22款最新嘅多功能打印機，全部採用噴墨打印技術，啱晒屋企用，價錢由588蚊至3,288蚊，豐儉由人。經過咗打印、掃描、影印等八項測試，有幾部特別出色。佢推介話，如果唔係成日印嘢，佳能PIXMAMX308好抵用，只不過賣788蚊。如果屋企有幾部電腦，需要接駁網絡，惠普PhotosmartC8180（$3,288）係唔錯選擇，可以用有線或者無線方式連接電腦網絡。
小妹成日印相，有冇慳墨水嘅機？老友話，佳能嘅PIXMAMP610（$1,888）同MP520（$1088）最啱我，無論打印黑色文字、彩色圖片同彩色照片，墨水開支相對較低。
啱啱放低電話之嘛，又收到星巴克好姊妹嘅電話，提醒小妹呢個月25日朝早10點至中午12點，星巴克免費請飲咖啡一杯（荷里活廣場、時代廣場、昂坪、荃新天地、港鐵香港站、中環站、金鐘站、觀塘站除外）。
逢周一至周四刊出