食物及衞生局局長周一嶽上任後面對多個棘手問題，食物安全、醫療事故、流感疫症通通關佢事，所以被人冠以「周一鑊」花名，笑佢每個星期都爆大鑊要孭鑊。不過周一嶽對此唔係太介懷，佢同八方講，數真啲隨時唔止每周一鑊，「喺呢個部門做嘢，就等於做醫院嘅急症室一樣，幾時都有咁多嘢做，隨時都可能有大單嘢。」
食衞局近排推銷醫療融資，為咗令市民受落，今次宣傳用「打巷戰」策略，透過郵政署逐家逐戶寄明信片入屋，呼籲市民就建議提交意見。港府以前做重大政策諮詢，主要係向立法會、商會、學會收集意見，今次家家戶戶寄明信片應該係第一次，八方聽聞係食衞局官員集體創作，等唔留意新聞嘅市民都有途徑知道呢單大嘢。周一嶽又會重操故業「睇街症」，稍後會連續一星期長駐港台節目《千禧年代》，親自回答市民問題。