「馬英九贏，咪即係台灣被大陸佬搞掂！」堅決支持民進黨的香港傳媒人楊兆中說。上屆選舉都有到台灣觀戰的他認為：「今年一定要去，馬英九『咁好』，話唔定簽埋協議，將台灣變埋中國一部份，選埋今次就冇得再選，選特首那種（選舉），唔使去啦！」
對中國政府夠「硬淨」
為何支持民進黨？「過去雖然民進黨執政，但只得國民黨跟中國有啲偈傾，點解台灣人選出來嘅，因為是反對派，大陸就唔同佢溝通，你唔可以只同聽你講嘅人溝通，如果想中共改變、進步，應該畀民進黨做多一屆，到時大陸唔可能再不聞不問，唔同台灣政府溝通。」楊兆中說：「說到對中國政府的『硬淨』程度，民進黨會好啲，不會一面倒對中國傾斜，國民黨贏，說不定背後會替大陸政府做事。」
對於民進黨在民調中一直落後，氣勢又不及對手，他說：「民調唔準，好似話綠營人士唔喜歡做民調，謝長廷在南部選情是有些隱憂，但只要他再做多少少，一個議題，顯示到馬英九無能力執政，就可以扭轉局面。」楊坦言，謝長廷和馬英九兩個人背景差不多，做過市長，大家都想打通兩岸經濟的經脈，但謝的能力高些，任高雄市長時亦有政績。「就算國民黨贏，都唔會贏太多」；但他亦不諱言，對台灣民眾來講，民進黨做得差，馬贏也是應該。
四年前台灣大選期間，楊兆中去過阿扁的競選總部，當時逼滿人，但上月底他亦光顧過謝長廷的選舉精品店，發現人很少，市面亦很靜，氣氛不及當年熱烈，「這可能係經濟差，但民眾冷靜些都好，投票時唔會咁易被操控。」
本報記者