打Golf感覺似捉棋，每一步都影響大局。由以往貴族玩意，到現在唔學就會冇話題的Social運動，Golf迅速的普及的確驚人。由Golf發燒友口中的每一杆變數，係一世挑戰不完的魔力。今日一試，我開始有點兒理解，那種令人追的推力似乎就迫使我改變，投入這個大熱的高尚玩意。
攝影：楊錦文
http://appleblogpaper.blogspot.com
aboutme:空姐瑪莉
職業：使錢。唔靚唔愛，唔型唔要。細個見工最大的恐懼係填長處一欄，因為冇。人大了才發覺自己長處係夠八，乜都可以問一餐。
69%打Golf傾成生意
生活日夜顛倒，有幾日假放總在家中狂瞓。要我大清晨起身做運動實在係大挑戰。唔係表妹Katty幾經辛苦幫我Book埋，我都萬不願10點跑到入西貢碼頭，再轉船入滘西洲。作為全港唯一唔使入會的高爾夫球場，訂場自然慘過搶派米，一星期後的Booking往往全Full，通常只剩挑戰性較低的9個洞有位。不管你喜唔喜歡打Golf，都意識到Golf運動日漸普及。
Katty男友經常返內地陪老細打Golf談生意，她希望苦練技術做跟得女友，免得男友獨自北上。Katty有時帶一點懷疑：「拍戲咩？打Golf真係傾到生意？」我投以信任的一票，全因有滙豐銀行幫口，最近他們就發表了一項民意調查，結果顯示竟然真係有69%受訪者在打Golf時達成業務交易、三分一有錢人會約商業拍檔打Golf。被訪者遍及亞洲多個國家，Golf發燒友朋友Riks話：「有好多朋友傾生意都係打Golf，特別係菲律賓。其實任何運動都係一種聯誼，不過Golf就係優勝在毋須勝負分明，大家有共同目標而容易交流。打Golf需要嘅部署，令對方感覺有共同商業的策略。」一直於腦海內𠱁有錢佬畀生意你做的電視劇橋段，原來已經係家常便飯。
滘西洲係少林寺
滘西洲曾被英軍作軍事演習的小島，如今馬會把它改頭換面。幻想中綠草如茵的高爾夫球呈現眼前，每啖空氣都有一陣的草青味。由95、96年開始落成的南北場，至剛剛完工的東場，18個洞的果嶺費約$650（周末），連埋租用品、船費、租車或球僮，約$1,000一日。衰啲講句，比起要等人死先輪到會籍的其他高爾夫球會，Golf已經不再遙不可及。剛剛攞到HandicapCard（至少打過草地5次而得到一定分數才可申請）的Katty，今日帶我這個新手落場。幸得有兩位教練朋友Mabel同Eric有時間齊齊挑戰，否則逐個鐘計都要$650至$800。對住一大片南中國海洋打波的確幽美，但眼見每一個杆都要跨山澗水，果嶺之細，似乎難度極高。Mabel笑言：「係呀！香港地方細，設計場地時都要用盡山嶺，賽馬會呢個場嘅難度有少林寺之稱㗎。」不同場地會有不同挑戰性，環境因素變化之大，係Golf魅力所在。因此Golf場冇最好，只有夢想中一試挑戰的場地，Eric的夢想地係蘇格蘭的St.Andrew，而Mabel就揀昆明SpringCity。
普及化成大趨勢
呢個運動，在亞洲階級之分特別強烈。朋友Alan於美國打過：「其實美國咩階層都會打，因為人哋有啲冇咁Classic嘅場只係$10美金一場。直頭可以牛記笠記，唔使有衣着限制。（因為高球有一定的Manner規矩，唔可以着牛仔褲，上衣一定要有領。）」香港都正一步步普及，係慢啲啫。Mabel同Eric就係好例子，唔係出身富有，兩位由兼職投注及球僮到現在當上高球教練，身份三級跳。
Golf教練至少月入3至4萬，前景不錯，難怪有不少人都捨得送小朋友去學。Mabel教過年紀最輕的只有4歲，而Eric就正訓練一個只得15歲的少年港版TigerWoods。不過打Golf除了講天份、全身肌肉協調、高度集中、思考都係關鍵。容易心煩氣躁的我，可以話被篤中死穴！
查詢：
賽馬會滘西洲公眾高爾夫球場場
主機：27913388
自動電話訂場系統：27913380
最新回應
King：我喺加拿大打咗Golf好多年，都有參加比賽，但就未試過喺香港打。不過，真係越嚟越多人打就真，見到啲參賽者仲越嚟越後生。
Riks：我通常都係返大陸打，地方大好多，好多洞嘅設計都要轉彎，好玩啲又平啲。不過我都打過滘西洲一次，要帶住咁多嘢搭船，覺得都幾麻煩。
相關超連結
http://www.kscgolf.com/index.asp
賽馬會滘西洲高爾夫球場係全港唯一公眾球場，唔使有會籍都可以打18個洞，自然特別多人爭。雖然訂場只可以用電話，但網址除有球場詳細介紹，亦可以睇到預訂情況。
http://www.golf007.com/main.htm
這個007網址有關於高爾夫球的任何資料，包括大陸球場評論、技術討論區、一些短線優惠、用品買賣及訂場服務等。無論新手定發燒友，都一定有用。
