韓國女歌手蔡妍為宣傳佢首張中文專輯《愛人》，前晚喺北京舉行發佈會兼迷你個唱。當日蔡妍着上短裙，打扮性感又不失可愛，佢仲以生硬嘅普通話向內地fans問好，然後唱出《愛人》、《兩個人》等多首國語、韓語快歌，令場內氣溫急升。早前蔡妍曾演出內地節目《名聲大震》，內地演員兼好拍檔保劍峰都有到場，仲致送北京奧運福娃公仔為佢打氣，稍後蔡妍仲會到江西等地為唱片宣傳。