噚日係公民黨成立兩周年正日，佢哋話自己係「環保黨」，所以唔鋪張慶祝。不過喺香港搞民主唔係咁易，捱到兩年，總算係個小小里程碑，佢哋話要與時俱進、力求創新，打個黨徽主意，幫個黨徽做咗少少「整容」工夫。
今次黨徽改動唔算大，只係小裝修，唔係大工程。公民黨黨徽由英文簡稱C、P兩個字母組成，配上綠、紫、白三色；以前個黨徽兩個字母分開，新設計合埋一齊，線條亦粗咗好多。黨魁余大狀話，公民黨創黨兩年發展豐盛，𠵱家有逾300黨員，新黨徽線條粗壯，正好象徵個黨越嚟越壯大。
新口號更「入屋」
除咗小裝修黨徽，公民黨亦改埋口號，由以前「為公為民，香港精神」，轉做「好在仲有公民黨」。佢哋話係集體創作，意念則係由第二梯隊余冠威貢獻，余冠威話呢句口號易上口，希望市民易記得。湯大狀則形容新口號通俗，反映佢哋願意走入民間，唔係高高在上大狀黨。
其實新口號有個「足本」，仲有後面三句，「為民請命勇擔當，你我齊心民主路，為公大道恆香江」。黨主席關信基解釋，香港民主路崎嶇，但公民黨希望同市民一齊行，希望終有一日開花結果，而且「政府黨」不斷壯大，社會更加需要一個堅持理想嘅在野黨，所以佢哋會企硬到底。
公民黨呢次小裝修表面睇冇乜特別，八方收到風可能別有內情，事關過去一年黨魁余若薇同主席關信基先後患病，關信基稍後要做多次心臟手術，如果呢次改黨徽有助改運，八方支持盡早改，否則衰運延續到今年立法會選舉就麻煩！公民黨大狀信邪係公開秘密，好多人笑言資深大狀陳景生係佢哋「榮譽顧問（玄學）」，改黨徽同風水有關絕不出奇。
改黨徽暗藏玄機
八方請教風水師傅麥玲玲，佢話公民黨舊黨徽好似斷開幾截，對團體發展確係不利，新設計合二為一，「完整性、包容性都好好多。」佢又指綠、紫、白三色分別屬木、水、金，有相濟作用，利好該黨發展，唯一敗筆係揀噚日四離平日轉用新黨徽，因為諸事不宜，改為今日好好多。改黨徽事關重大不容有失，小改唔夠應該大改，八方建議加多「浸」防左仔批鬥批盪，髹上防霉運油漆，掛喺黨總部鎮場，包保大吉大利。
mailto:[email protected]