台灣大選殺到埋身，香港出世嘅馬英九好大機會做總統，所以唔少香港人留意選情，本港幾個政黨都有成員去台灣觀戰，八方聽聞台灣方面今次最少接待2,800個香港政團代表，一般市民更不計其數，非常熱鬧。
台灣朋友同八方講，今年大選咁多香港人去台灣直擊，係因為上屆投票日前發生槍擊案令選情大逆轉，呢種緊張氣氛，香港選舉冇可能感受到嘞。
大食過男團員
公民黨一行15人噚日出發，第一站係台南，據余冠威現場報道，佢哋落機後獲接待單位帶去食晏，飽餐一頓後去咗國民黨高雄市競選總部參觀，點知陳淑莊（Tanya）見到有間地道鴨肉店，為食嘅Tanya即刻拉埋佢同曾國豐，三個人再食多餐，兩個男士都吃不消，Tanya卻食得津津有味，更揚言夜晚要橫掃六合夜市！
公民黨觀戰團由副主席黎廣德帶隊，佢話首要任務係確保團員唔好俾熾熱嘅大選氣氛過度感染high過龍，未完成行程就散晒，八方建議佢最好督促埋各人節制飲食。黎廣德認為今次選情最大變數唔係有冇神奇子彈，而係西藏局勢會被民進黨攻擊，隨時影響選情。