《時代》雜誌抬舉香港，創製新語Ny-Lon-Kong（紐倫港），一時之間，不少香港人為之飄飄然。點知道即將離職嘅英國駐港總領事柏聖文唔識做兼唔客氣，到FCC出席告別午餐會，竟然話香港與倫敦、紐約相比，只係一個小鎮，將來仲會落後於北京上海㖭。
柏聖文咁唔客氣，皆因佢認為（一）香港人只講廣東話，普通話唔掂，英語水平大倒退、（二）政府只識發展金融，唔識文化藝術。世界的大城市點可以冇文化呀？佢呢番說話可能私底下發表過，政府上咗心。曾特首就不止一次講過，建設西九龍文娛藝術區係香港金融中心一個重要部份。
經常騎馬學習馬術嘅廣告Ｋ睇到關於柏聖文嘅報道，有另一番意見。廣告Ｋ講到：「到咗今年奧運馬術賽，就會知道香港觀眾是否小鎮居民嘞，馬術係歐洲上流社會與中東皇室人士嘅體育項目，好多規矩，好多原則，觀眾睇馬術，千祈唔好學沙田馬場馬迷咁大聲呼叫3號，3號頂住，頂住呀。睇馬術要保持肅靜，不可喧嘩大講大笑，不可在比賽進行途中拍手掌，不可用閃光燈影相，保你大，唔好一邊睇，一邊剝花生！香港觀眾到時如果在馬術場內嘈到坼天，大聲講電話，就會貽笑大方，俾外國傳媒話我哋係鄉下仔，香港唔係國際城市，香港好provincial。」
入場睇奧運馬術有咁多規矩，令人擔心。最近有外國馬術人員與傳媒界人士訪港，觀察馬會興建嘅馬術場地，睇完讚不絕口，認為香港嘅馬術設施在世界上屬於secondtonone類別。香港嘅硬體建設素來一流，從來唔會輸蝕畀外國，只怕一小撮鄉下佬破壞軟體啫。廣告Ｋ講provincial唔係講「省級」、地方上的，而係見識不廣似鄉下咁解。好多年前左丁山有一位高級外籍同事被派往星加坡，做亞洲區主管，佢住咗半年之後，就猛咁話星加坡好provincial，千方百計將亞洲總部搬嚟香港。今年香港碰上幾十年以至一百年難得一遇嘅機會，主辦奧運馬術賽，希望上下一心，在世人面前證明香港不是鄉村小鎮。