任天堂嘅電子遊戲機Wii易用易玩,大人細路都着迷,唔少人都買番部看門口用嚟招呼親戚朋友,呢股Wii熱潮終於吹到立法會,今年5月立法會舉行打Wii大比拼,議員都玩埋一份。
議員記者鬥打Wii
立法會忽然變機竇,係因為舉行議員記者同樂日。同樂日有多年傳統,係做立法會新聞嘅記者同議員聯誼活動,以前喺運動場搞球賽同競技,近年從簡食餐飯就算,今年可能因為主席范太告別,有關方面發大嚟搞贈興,加插幾個遊戲項目,包括問答比賽同無火煮食大賽,八方最有興趣係議員同記者比賽打Wii。
Wii係後生仔玩意,記者可能佔上風,八方聽聞議員唔多熟悉,只有個別議員間唔中同仔女親子玩吓,不過Wii易上手,如果議員秘密練兵,殺記者一個措手不及都唔係冇可能,而個別項目,八方恐怕議員隨時玩得叻過記者。
白鴿黨主席何俊仁之前俾人襲擊,打到爆晒缸,佢有實戰經驗,如果玩《WiiSports》個打拳game,八方相信一般人未必係佢對手,就算佢唔識避,至少唔怕俾對手打,仁哥勇字當頭,打輸罷就,邊個夠佢砌先?前主席高達落場又唔同,佢俾人兇即刻報警,八方一於叫行家有樣學樣,開賽前兇佢「係咪想死?」實嚇到高達掉頭走。
《WiiFit》有個遊戲好有挑戰性,八方怕玩又鍾意玩,就係行鋼線,如果議員想贏呢個遊戲,千祈唔好派劉千石或「劉千石化」嘅馮檢基上陣,因為佢哋係踩鋼線失敗人辦;搵陳太玩最啱,佢又要爭取普選又要同北京溝通,玩平衡出神入化,win梗。
至於呼拉圈遊戲,有人指腰骨柔軟嘅富貴黨田少最在行,因為佢身段柔軟到由功能組別轉戰直選,如果佢示範箇中秘訣,應該對黨友劉健儀有一定啓發作用,如果劉健儀學識放軟身段,相信對直選冇咁抗拒。
保皇黨碌齡輸梗
另一個好多人沉迷嘅遊戲係打保齡球,碌齡最忌偏埋一邊,但又要識得運用巧勁落「西」,好蝦人玩,保皇黨譚耀宗之流言行成日側埋一面,玩呢個game凶多吉少碌落坑;八方認為范太先係高手,明明係阿爺嘅人,卻又表現得好中立,政治手腕令人嘆為觀止,碌齡實贏到開巷。今次比賽冇講明唔畀請外援,議員隊如果搵李國章幫手就最啱,講到喺立法會打機,邊個叻得過佢先!
mailto:[email protected]