林海峰（Jan）本月初做完其棟篤笑演唱會後，由於反應熱烈，商台決定5月底再加開4場，而且還請來阿Jan的好拍檔葛民輝任特別嘉賓。對於加場，Jan謂既驚且喜，最近他正密切留意娛樂圈熱門話題，因加場的棟篤笑內容會全新創作。
林海峰於5月28日至31日，將會再踏足紅館舉行4場棟篤笑演唱會，據悉這個檔期原本是許志安的個唱期，但商台出面向東亞借期，最終東亞賣了這個人情給商台，而安仔演唱會就會押後到明年才舉行，為了增加阿Jan棟篤笑的新鮮感，商台更找來其軟硬拍檔葛民輝任嘉賓，到時兩人會在台上大鬥嘴。
停開咪專心籌備
對於今次再加開4場，阿Jan開心地說：「上次欠落人哋好多飛債，𠵱家最高興係終於有飛還畀人啦！不過加場又要畀新嘢大家睇，所以又要絞盡腦汁去全新創作棟篤笑內容，呢排真係要密切留意有乜嘢城市話題，等我可以有多啲嘢去發揮。」他在開show前六個星期，會暫停主持電台節目，專心籌備。
今次阿Jan找來阿葛擔任特別嘉賓，主要是為了替軟硬明年再開show試反應，因商台明年有意再主辦軟硬演唱會，商台助理總經理甘菁菁昨日接受電話訪問時說：「其實之前軟硬都一齊開過騷，反應好好，所以公司有意再主辦，而五月阿Jan棟篤笑演唱會加開四場，反應好好，因為上次唔夠飛賣，今次加場就可以優先畀上次訂唔到飛嘅觀眾，另外，商台又會為阿Jan再推出新紀念品喺紅館出面賣，因為阿Jan啲紀念品一向好好銷情，我哋都唔想加場又賣番舊嘢。」
採訪：葉雪
