保衞皇后碼頭人士舊年8月被警員逐一抬走清場，事隔接近八個月，警方噚日先至落案起訴其中一名保衞人士王恒創（暱稱阿草）阻差辦公，阿草噚晚自簽100蚊保釋候審，呢個月26日上庭。
阿草噚晚到灣仔警察總部攞起訴書，佢指過去222日每隔幾個星期就要到海傍警署簽到，每次交通費要30幾蚊，仲要喺警署最少等候兩個鐘頭，質疑警方有意留難佢。佢又指警察上佢母親屋企，嚇親阿媽，分明係滋擾。
噚晚一班保衞皇后戰友到場聲援阿草，佢哋用警務處長鄧竟成個名嚟作標語揶揄一番，「鄧警誠意阻示威，官商毒攬規劃權」。女長毛仲將鄧竟成嘅相片攞出嚟擺喺地上畀大家踩同當小人咁打，在旁嘅警員見一哥俾人踩並冇阻止，會否秋後算賬就唔知嘞。