張繼聰與謝安琪在06年奉子成婚，他前晚在《蘋果》網站直播節目《娛樂開CHAT》接受訪問，當主持王友良問到他如何追求謝安琪時，他自爆二人的媒人是日劇中的木村拓哉，因為大家都愛看日劇，所以一拍即合。囝囝張瞻現已九個月大，當主持考驗張繼聰如何給玩具BB換尿布、餵奶和掃風時，他都顯得十分熟手。有子萬事足的張繼聰，計劃待兒子張瞻大一點便再添丁。大家可登入《蘋果》網站 http://ent.appledaily.com隨時重溫節目。
採訪：比華利、懷鈺
攝影：仇志中
背埋對手台詞
觀塘 Apple
Apple：你即將做話劇，背台詞係咪好難呀？
張繼聰：呢個係㗎，呢個係隨住我年紀上升，背台詞係越難嘅，同要用多啲時間練習，仲有我唔會死記，我會背對手嘅台詞，畀應有嘅反應，我會容易記到多啲。
Apple：咁你係咪好多對白㗎？
張繼聰：今次嘅舞台劇，其實都多㗎，上一次10月嘅時候都花咗好多時間綵排，今次重演，其實喺2、3月就已經開始pickup番啲台詞囉，經過上次演完，今次已經好好多。仲有，我嘅台詞唔係最多，最多係倫永亮囉，所以佢近期都好似溫會考咁，希望你過嚟睇吓我哋努力嘅成果！
作曲度身訂做
旺角 小K
小K：好犀利，張繼聰頭先（幫玩具BB）掃風，你太太有冇教你呀？佢識唔識㗎？
張繼聰：識㗎，某程度上佢比我仲熟啲㗎，因為始終媽咪同小朋友嘅關係會再密切啲，佢都會教我㗎，同埋佢會篤住我囉。
小K：咁係你湊得多定係佢湊得多呀？
張繼聰：都要睇番我哋兩個嘅工作囉，通常都係工人呀，爺爺嫲嫲呀多的嘅，始終我哋都要工作，而我哋一有時間都會湊BB。
小K：你𠵱家有冇寫歌畀其他歌手同自己呀？
張繼聰：有呀，其實喺08年呢幾個月都有寫歌，幫自己嘅新碟寫歌。另外，亦有幫其他歌手寫好多歌，我諗喺下半年會聽到㗎喇。
小K：啲新歌係乜嘢風格呀？
張繼聰：幫人哋寫嘅歌多數係度身訂做嘅，自己嘅會係funk啲搖滾啲，同之前R&B好唔同。
