韓國電影《密陽》橫掃「第二屆亞洲電影大獎」三個大獎，包括最佳電影、最佳導演同最佳女主角獎，頓時成為潮人追捧電影，連商務及經濟發展局局長馬時亨都心郁郁，話一定要搵時間睇吓呢套戲有乜咁巴閉，可以掃低《投名狀》同《色，戒》，就算已落畫都要買DVD欣賞。
肥馬噚日朝早出席「第一屆香港流動影片節」頒獎禮，見到頒獎嘉賓之一嘅諾基亞代表，就叫對方有乜新款手機要即時通知佢，肥馬𠵱家用緊諾基亞E65，功能都算強勁，應該唔使咁快升級換機，只係今個月政府場地首批Wi-Fi無線上網設施啓用，佢想叫手機商推出多啲可用Wi-Fi手機，等市民多啲選擇。