陳慧琳（Kelly）近日風塵僕僕穿梭於中港兩地，為新片《江山美人》宣傳。前晚，她亮相《蘋果》網站直播節目《娛樂開CHAT》，與主持懷鈺暢談拍攝該片的苦與樂。Kelly表示北上前曾接受三個月的地獄式特訓，課程包括騎馬、舞刀弄劍、演技和普通話發音等，當時因未知劇情有何需要，故甚麼東西都要練定學定，因而消化不來，導致精神崩潰、渾身肌肉痠痛，身心上比正式開拍後還要辛苦。懷鈺問Kelly有甚麼減壓方法時，她說每晚都會在家中浸浴，還透露了她的獨門減壓秘方，就是用玫瑰花味或薰衣草味香薰油混合BB油來浸浴，她還笑說那三個月只有浸浴時才覺得自己是個女人。大家可登入《蘋果》網站 http://ent.appledaily.com隨時重溫節目。
採訪：林惠卿、懷鈺 攝影：仇志德
讚Kellyjackie靚女 香港區KJ
KJ：Hello，Kelly。你認唔認得我啊？
Kelly：Kellyjackie，我心諗呢個女仔幾靚喎。
KJ：多謝，你之前喺日本做過導演拍過一套戲，我想問其實你有冇諗過將你自己嘅歌拍一個musicvideo，甚至係一個音樂電影？
Kelly：TVB時拍過一個音樂特輯，如果叫我自己自編自導自演，我已經知我唔會點拍，因為我可能只係一路影我行街，播住歌一路行街，一定冇人睇。
KJ：你之前同王敏德唱過一首英文歌，你日文、國語、廣東專輯都出過，有冇諗過出英文專輯？
Kelly：可能唱片公司唔會幫我出呢啲，因為𠵱家廣東碟都咁難賣，所以暫時都唔會。
主持：咁你自己想唔想出英文專輯？
Kelly：暫時都唔係咁想，我寧願拍戲多啲，因為英文歌其實我之前都有唱，但全隻碟係英文就暫時唔考慮住。
新碟主打快歌 溫哥華Nicky
Nicky：你第一隻派台歌係《抱歉柯德莉夏萍》，咁你第二隻歌會係乜嘢呢？
Kelly：其實《隨夢而飛》算唔算呢？因為呢首同黎明合唱嘅《江山美人》主題曲已經派緊。如果你話我自己嘅歌，就應該係即將開嘅演唱會嘅主題曲，今日啱啱起咗80%，仲有20%要去完新加坡先可以錄，首歌都幾型㗎。
Nicky：你今次新碟裏面係以快歌多還是慢歌為主？
Kelly：今次會快歌多，慢歌係得兩、三首。
Nicky：另外我想問Kelly，你個演唱會大概會幾時，因為我想抽時間返嚟香港睇呀。
Kelly：6月13開始，暫定6場，快啲返嚟啦。
小歌迷送飛吻 太子熙熙
熙熙：Hello，姐姐。你好靚啊，拍戲辛唔辛苦啊？
Kelly：好辛苦啊，不過你去睇呢，我就冇咁辛苦喇！
熙熙：我都一定會去睇㗎，騎馬驚唔驚啊？
Kelly：騎馬好驚啊，隻馬跑得好快啊，同埋佢好大隻啊。
熙熙：怕唔怕跌親啊？
Kelly：跌親啊，跌咗好多次落嚟啊！
熙熙：痛唔痛啊？
Kelly：痛啊，但係𠵱家痛完又冇嘢喇。
熙熙：我錫番你啦！（飛吻）
個唱潛入水底 九龍灣Sharon
Sharon：你唱片同演唱會會以乜嘢為主題？
Kelly：唱片會以時尚cover為主，因為今次快歌多，感覺比較punkpunk哋。而演唱會主題都係以快歌為主，其中我哋主題係《LoveFighter》，openning會有少少《江山美人》feel，但會係現代版，出嚟感覺都幾型。好似將軍咁，有好多手下，有好多隊形，有一part我自己幾鍾意，係我同個女仔鬥跳舞，又有一part係水底世界，會有好多海洋生物搬上紅館。
