洛杉磯實試<br>316匹開篷大班 惡過AMG

洛杉磯實試
316匹開篷大班 惡過AMG

記得細個嗰陣,朋友爸爸擁有一部Mercedes-Benz開篷跑車,外形雖然方到成個盒咁,但望落好有台型,後來我先知佢就係鼎鼎大名嘅SL。今日,新一代型號終於推出,唔只3.5V6引擎提升馬力,而且換咗車頭Design,望落都型過超辣嘅AMG版!不過最重要嘅,都係我可以揸住佢喺美國洛杉磯嘅山路飛馳,親身感受呢位「開篷大班」嘅威力!

記者、攝影:鄭達基
部份圖片由Mercedes-Benz提供

V形車頭更有動感

聽完Briefing後,就行過去喺酒店旁嘅MuscleBeach,搵番我嘅試車拍檔SL350。但喺呢個時候,我就俾眼前海天一色同美女如雲嘅景象吸引住,如果唔係同伴大聲叫,我早已行咗去沙灘同佢哋玩囉……
話說回頭,新SL350嘅外形同頭先嘅情景一樣吸引,事關佢保留咗電摺硬頂呢個賣點外,車頭仲經過重新設計,唔只頭燈由睇咗多年嘅「花生燈」變成L形,就連車頭線條都採用咗V形設計,令整部車即刻變得好有動感。另外,新車嘅Bi-Xenon頭燈可選配IntelligentLightSystem功能,啓動後會按ActiveLight、CorneringLight同EnhancedFogLamps等模式,為駕駛者提供唔同程度嘅照明,咁樣無論喺晚間或大霧嘅情況下揸車,都唔怕睇唔清前路。

■新加入速度感應轉向系統,喺彎路疾走會有更好嘅轉向表現。

■17吋合金胎軨係標準配備,後方仲加有鯊魚鰓入風口。

■稍呈成V形嘅車頭設計,令新SL望起嚟比以前Sporty好多。

■難得多部唔同顏色嘅新SL泊埋一齊,係咪好有氣勢呢?

開關篷頂按掣即成

同之前嘅SL一樣,新車都係配用電動硬摺頂,開關更只要㩒一㩒波棍後嘅控制鍵就搞掂,而需時更不超過30秒!

引擎馬力增16%

配用喺新SL350身上嘅一台3.5公升V6引擎經過調校,馬力增加約16%至316匹,耗油量減少0.4L/100km。至於設有軚盤+/-轉檔撥片嘅7G-Tronic半自動波箱,加入咗Double-declutching功能,當你拖波嗰陣,除咗畀到你手波車嘅感覺外,更為波箱提供一定嘅保護。
朝距離酒店約190公里嘅SilverwoodLake出發,初段大部份時間都行高速公路,只要踩深些少油門,車速已達100km/h,及後前有慢車,於是轉用軚盤轉檔撥片拖波,發覺波箱反應好順滑。再上迂迴嘅山路,更發現引擎動力源源不絕,加上360Nm嘅強大扭力,即使彎前急煞再畀油出彎,都可以輕鬆完成整個動作。

■3.5V6引擎經調校後馬力增至316匹外,耗油量更稍微下調。

■喺7G-Tronic波箱轉檔夠順滑。

■軚盤後方有轉檔撥片,彎前拖波剔一剔就搞掂!

音響可讀SD卡

我發覺新加嘅Direct-steerSystem都帶嚟唔錯嘅操控表現,電腦會視乎車速快慢嚟控制轉向比例,令軚盤轉幅增加或減少,咁樣唔只喺高速行車時有更穩定嘅轉向表現,就連倒後泊車都有幫助。
終於嚟到目的地SilverwoodLake,係時候慢慢欣賞佢嘅車廂陳設。講真,新車嘅車廂陳設其實同舊有型號相近,但一雙座椅嘅頭枕就加入咗可以送出暖風嘅Airscarf功能,喺嚴寒嘅天氣下開咗篷嚟揸都唔使怕凍,而一套由HarmanKardon提供嘅音響,除傳統CD外,更可播放儲存喺SD卡入面嘅音樂,方便得多。

■除CD外,音響更可以SD卡作音樂儲存媒體。

■車廂陳設同上代型號分別唔大,感覺上好似欠缺些少新意。

■座椅有電熱功能外,頭枕亦加有Airscarf功能。

同場加映LA靚景

■拍攝期間巧遇Ford嘅老爺車,古今風情相映成趣。

■美國果然咩都大過人,你睇吓火車大過SL幾多!

新車速蘋

.呈V形嘅新車頭設計,望落真係型好多。
.波箱有Double-declutching功能,轉波快夾順。

.雖然外觀有變,但點解車廂陳設好似無變?
.都係開篷車老問題,開篷後唔使諗有大尾箱用。

Mercedes-BenzSL350規格

引擎:3,498c.c.V6DOHC
馬力:316hp/6,500rpm
扭力:360Nm/4,900rpm
傳動:7G-Tronic半自動波,後輪驅動
尺碼:4,562×1,820×1,317mm
軸距:2,560mm
車重:1,825kg
0-100km/h:6.2秒
極速:250km/h(有限制)
查詢:仁孚行(28957339)