尋找快樂可以好容易，亦都可以好難。好似球壇勁旅巴塞隆拿班球員咁，明明已經名成利就，最近竟然怨天怨地，個個苦瓜亁咁嘅面口，有啲仲借酒澆愁，真係幸運之神見到你都繞路走，睇嚟佢哋今季歐聯同西甲都係危危乎！
頭號球星「細哨」朗拿甸奴，周二被傳媒踢爆上周中通宵飲酒，第二朝打電話返球會話右腿有傷參加唔到操練，點知會方企硬，都要乖乖到場。教練列卡特一睇佢腳步浮浮、眼袋大過對眼，肯定佢前一晚蒲完嚟，就以「細哨」受傷為由，唔使佢參加剛過去周日打和艾美利亞2:2嘅聯賽，順便吩咐軍醫徹底同佢驗傷。
「細哨」夜蒲訛稱受傷
結果，巴塞隆拿隊醫偷偷同傳媒爆料，話份報告證實「細哨」根本無病無痛！我求大俠真係唔知列卡特係真懵定有心同「細哨」玩嘢啦，不過，呢件事講明一個事實，就係「細哨」經歷過體重超標等一系列非議後，心情的確好差，不過正所謂借酒澆愁愁更愁，都係飲少兩杯啦！
呢個憂愁情緒亦籠罩整個巴塞，前鋒亨利埋怨完成日打左翼兼冇正選，又話好掛住個女，搞到好內疚影響表現；美斯最近重創後已離開傷心地，飛返阿根廷老家療傷；就連新仔杜斯山度士都話唔開心，透過經理人向會方要求加薪，仲話有好多球會想斟佢。
杜斯山度士好價即賣
巴塞大到亨利、細至杜斯山度士都話唔快樂，呢個時候就睇球會嘅危機處理啦！不過，照目前嚟睇就唔及格嘞。首先，隊醫份「細哨」嘅驗傷結果，竟然洩漏畀傳媒；至於杜斯山度士扭計一事，技術總監碧格利斯坦已收到「柯打」，有人出到1,000萬歐元（約1.2億港元）即賣！
哎！球員唔快樂，連教練列卡特都擔驚受怕，隨時季尾收大信封，你話巴塞現時咁嘅情況，聯賽又落後皇馬7分，今季仲會有咩希望呢？唔通佢哋要到下季先尋找到快樂？
你的意見?
●你認為巴塞隆拿季尾會不會星散？
請上 http://hk.myblog.yahoo.com/appleballmen/〈球蘋家〉留言