嚇驚全城嘅鳳姐連環殺手疑兇雖然已經落網，不過姐姐仔仍然人人自危，擔心有狂徒有樣學樣對付佢哋，真係開工又驚，唔開工又愁。從事性工作都係工作，唔理你鍾唔鍾意呢個行業，佢哋確係存在做生意，勞工處不斷宣傳工人要做足職業安全措施，性工作咁高危，如何保障人身安全不容忽視。
協助姐姐仔嘅組織紫藤噚日同警方高層開會，要求警方保護姐姐仔，紫藤職員林依玲同八方講，佢哋構思建議姐姐仔安裝平安鐘，即係獨居老人必備嗰啲「救命鐘」。八方乍聽覺得有啲無厘頭，姐姐仔做生意就要安裝一個門鈴喺門外俾人㩒鐘仔啫，自己安裝個平安鐘做乜鬼？
警方試過使橫手
後來請教過業內人士，發覺可能真係有用。𠵱家市面有幾個機構提供平安鐘服務，原來除咗老人家安裝，一啲獨居女子都有幫襯，如果有匪徒入屋，㩒一㩒個鐘就有人救援，唔少長期病患者同有幼兒家庭都有安裝，都係以防萬一，一旦有意外可以即時召人幫手。
既然平安鐘可以救命，如果姐姐仔喺做生意單位內安裝一個，遇有突發事故時話唔定可以保住條命，唔使好似𠵱家咁，要等姊妹打電話問候報平安，到搵唔到人時先報警就賊過興兵嘞。八方聽聞警方對呢個建議幾有興趣，不過姐姐仔就唔係咁樂觀，事關佢哋安裝平安鐘，就要向有關機構交月費，若然差佬玩嘢，指呢啲機構幫姐姐仔做生意，即係依賴妓女維生啦，可以隨時用呢個罪名控告有關機構，屆時冇人肯幫佢哋安裝，最終都係得個講字。
姐姐仔憂慮唔係冇道理，事實上警方以前試過使橫手，向幫姐姐仔洗毛巾舖頭、單位業主施壓，指可以控告呢啲服務提供者依賴妓女維生，搞到冇人敢做姐姐仔生意，變相趕絕姐姐仔，都幾絕。話分兩頭，有人同八方講，安裝平安鐘都唔一定保障到姐姐仔安全，事關𠵱家平安鐘運作係一㩒鐘就響，如果姐姐仔遇劫時㩒鐘，匪徒隨時痛下毒手，姐姐仔咪死快啲？八方認為呢啲只係技術上小問題，可以輕易解決，煲呔政府鼓勵發展社會企業，平安鐘正正係搞得成功嘅例子，鳳樓平安鐘呢個市場有潛力，八方希望官員拆牆鬆綁，畀個機會有心人幫姐姐仔，畀個安心全港性工作者。
mailto:[email protected]