淫照風暴引爆後至今近兩個月，事件女主角之一、被傳被廣告商嫌棄的張栢芝繼續閉關，其丈夫謝霆鋒則於昨日出席新片《風雲II》記者會，公告下月復工拍戲𢱑銀。暴瘦一圈的霆鋒雖然高調出示掛在頸上的結婚戒指，以證與太太情不變，但提及淫照事件時卻表現耿耿於懷，揚言「呢啲咁丟架嘅事，畀全世界人指指點點」，霆鋒心中氣難平，男人最痛，大抵莫過於此。
轟動全城的淫照風暴於1月27日爆發後，網上曾流傳121張疑似張栢芝的淫照，但栢芝一直未曾公開露面，且因受風暴波及致廣告商紛打退堂鼓。栢芝丈夫謝霆鋒則繼2月底到河北行騷後於昨日再度現身，在灣仔會展出席彭氏兄弟執導新片《風雲II》新聞發佈會，宣佈下月復工拍戲，看來霆鋒不只獨力面對淫照風暴，更要一力扛起養家責任。
近日激瘦的霆鋒，整個人有如縮水般瘦了一圈，昨日他身穿白色Biker，展現掛在頸上的結婚指環及一個刻上「L」字鐵牌，以行動力證與栢芝情不變及倒神秘人「奇拿」。
否認懷孕
睇戲打機情不變
有備而戰的霆鋒對忽然激瘦解釋說：「我喺再前一排瘦咗，因為要做旺角大球場個騷。」旺角球場騷於1月21日舉行，首輯疑似栢芝淫照則於1月29日流傳，即示意他變瘦與淫照無關，霆鋒又說：「好似今朝我凌晨4點起身睇《Rocky》，睇咗3、4個鐘，一路睇一路操練，嚟緊兩部戲同一時間拍攝，都係同武打有關，每日有時間就操。」
問霆鋒會否抽時間陪太太？他說：「有好多時間打機，兩個一齊打。」再問他與栢芝感情如何？他強調沒問題：「我哋一齊出街睇戲，啱啱睇完《公元前10,000年》。」有報道指栢芝再度懷孕，霆鋒斬釘截鐵說：「冇。我打機又好，我喺度操（健身）又好，湊仔又好，我係與世隔絕，我好落後嘅，今日先聽到有人咁講，我今日答你哋冇。」
曾斥淫照事件令香港不光榮的霆鋒更氣難平，他指摘道：「對於呢件事（淫照事件），我要講嘅係，我同我太太感情好好，我娶佢嗰日，好清楚佢係乜嘢人，佢亦都好清楚嫁個乜嘢人。呢件事發生咁耐，第一係已成過去，第二，今年香港同所有黃皮膚兼中國人，大家留意嘅係主辦奧運，中國人值得驕傲，呢啲咁丟架嘅事，畀全世界嘅人指指點點，不值一提，再提會損害同騷擾香港人，會損害香港人嘅面子，唔關我謝霆鋒事，係香港人嘅事。」
霆鋒稱他與世隔絕，如淫照風暴爆發當日，初時他也未知嚴重性，他憶述道：「我打打吓機聽到呢件事發生，我坐的士去睇戲，又聽到收音機講，先知道咁大件事，不過呢啲係新聞，言論自由。你睇吓泰國、韓國、台灣，人哋係保護娛樂圈，第一藝人要爭氣，第二呢啲傳聞唔係香港人踩香港人，香港嘅資產係藝人。」
渲染淫照
對香港娛圈心淡
此時霆鋒有點不悅地說：「件事好威咩？要提足3個月咩？叫奧運頒個金牌畀你好冇？」問霆鋒是否有壓力？他說：「係零，𠵱家喺屋企行出房，睇到啲報道、訪問，話呢件事Ohmygod，我覺得咁樣對娛樂圈好心淡，𠵱家日本娛樂圈過咗我哋，我哋係東南亞嘅舞台，唔可以畀人過。」至於栢芝現時心情，霆鋒形容跟他一樣，但對於屢傳栢芝被抽廣告，霆鋒則撐嬌妻道：「唔係，你哋啱啱問過我會唔會生第二個，佢咁多工作，何來努力呢？」問霆鋒是否正努力造人？他卻說：「你哋咪啱啱問我瘦嘅……」示意與妻非常恩愛。最後霆鋒向記者晒頸上婚戒，問他是否與栢芝感情更進一步？他說：「係冇影響過，朋友又好，家人又好，經過一啲事件，感情只係會有增長。」
採訪：張俊銘
攝影：葉君海
戴L字鏈抗奇拿
淫照風暴發生後，網友慣以日本漫畫《死亡筆記》的奇拿去稱呼在網上發佈淫照的神秘人，而霆鋒昨日出席活動時，頸上除掛上婚戒外，還有一條「L」頸鏈，盡顯其跟奇拿抗衡到底的決心。
同款賣140元
漫畫《死亡筆記》中，偵探L以緝捕奇拿為目標，可惜在漫畫中棋差一着，最終被奇拿殺死。在電影《死亡筆記：最後的名字》中，結局則改成L自覺難逃被奇拿殺掉的命運，而選擇在筆記上寫下自己的名字自殺，至於外傳《L之終章．最後的23天》則交代L在筆記寫下自己安樂死，及死前23天發生的故事。
此外，日本拍賣網有跟霆鋒所戴款式近似的「L」頸鏈，叫價約140港元。
撰文：林妃
