打吡大賽果然一如所料，由胡寶星爵士子女擁有嘅「喜蓮福星」贏咗，但贏得都幾辛苦，要與羅建生嘅「喜聚寶」鬥足半條直路，曾一度落後，幸好騎師高雅志雖然年近五十，但經驗豐富，拚命推騎，卒之反勝「喜聚寶」，後者在世界級騎師蘇銘倫大鞭大鞭打落去之下，已經跑到盡，輸咗無話可講，好多馬迷都話「喜聚寶」俾蘇銘倫騎得咁盡，今季怕要唞吓咯，如果急於再出，唔使買。講起蘇銘倫，不愧為職業「殺手」，三月十六日中午先至乘機到港，立即趕入馬場，佢居然完全冇體力問題或所謂jetlag，充份發揮佢嘅專業精神。
「喜蓮福星」據講價值不菲，但來港短短四個月，出咗三場，得兩冠一亞，已獲獎金一千五百一十萬元（打吡頭馬獎金有九百二十八萬），抵番晒啦。如果隻馬冇事，今年十二月嘅香港國際賽點甩得佢一份呀，成為新一代嘅「爪皇凌雨」，有厚望焉。
左丁山當日畀貼士，中大熱三重彩，算係咁。當日出席馬主Ｋ嘅打吡招待會，一入門就見到陳南祿夫婦到場賀馬主Ｋ，左丁山問飛機陳：「今日有冇機？」佢話：「日日都有機。」馬主Ｋ話佢搞打吡派對，今年係第二十一年，預備搞到第二十五屆就告一段落，左丁山連忙話：「唔該你買隻靚馬返嚟，四年後再贏一次打吡先至係創造高潮。」馬主Ｋ上次憑「先見之明」贏打吡，好似係一九九六年，記得係二十倍冷門，由靳能策騎，擊敗大熱門「百看不厭」（馬主邢李㷧），贏完之後，馬主Ｋ至今未有一隻馬好得過「先見之明」，所以話贏打吡真係好好運嘅，難以重複。
馬主Ｋ搞打吡派對，豪氣十足，包晒沙田會所六樓全層，每個賓客送一條Hermes領呔，我哋要立即換呔，以示一致。呢條呔係馬主Ｋ特別訂製，主色就係馬主Ｋ自己嘅綵衣，寫明係MadeinFrance100%絲質，除此之外，仲有保暖杯送及外國打吡歷史圖片製成嘅明信片，然後仲有專家代客批命，電腦氣功測試等，請客請得咁有心思，馬主Ｋ真係不惜人力財力。