袁詠儀（靚靚）前晚以嘉賓身份行時裝騷時，透露近日流感肆虐，適逢她的囝囝魔童出牙仔發高燒，十分擔心。靚靚為保小魔童健康，採用高度殺菌及隔離方法，連丈夫張智霖（Chilam）都不能倖免，一向搵錢至上的她，更推了不少工作專心湊仔，實行魔童大過天。
袁詠儀前晚現身太古廣場，以壓軸嘉賓身份為Escada春夏時裝行騷，她在台上行了一半runway又折返，顯得有點不知所措，騷後她接受訪問時說：「我第一次行騷，大會又冇話畀我聽點行。」問她近日流感肆虐，如何照顧囝囝魔童，她說：「個仔因為出咗4隻牙仔，發高燒成37、8度，都不知幾驚，好彩𠵱家唔使返學，我都贊成停學，希望政府透明度高啲，有幾個人死咗先停學，不過唔講仲驚，啲家長無所適從。」
老公減少外出
為了照顧魔童，靚靚透露採取最嚴謹的措施，她說：「自己好小心，同個仔一齊返學，見到小朋友流鼻水，即刻拉開個仔，小朋友同佢握手都唔會握，好似好冷漠，其實係唔想傳染畀其他小朋友。」
靚靚續說：「呢兩日佢發燒，我都攬住佢，叫囝囝傳染畀我，其實佢之前已經打咗流感針，同埋將佢隔離，平時佢表哥都會嚟住，𠵱家都唔使嚟，屋企最多係口罩同殺菌用品。Chilam以前警覺性好低，為咗個仔，𠵱家都唔會成日出去玩，返到嚟都第一時間去冲凉。」
「個仔話唔要我」
向來熱衷搵錢的靚靚透露因為照顧囝囝，推了不少工作，她說：「之前拍咗兩個月電視劇，個仔話唔要我，之後要同佢瞓番一個星期，以前不嬲都賺錢為先，𠵱家會以囝囝為大前提。」
採訪、攝影：LawWaiMan