小妹唔算肥，平日懶做運動，之前同姊妹Carmen柴娃娃join咗做gym，但係去咗幾次就冇心機，成日對住啲機覺得好鬼悶。上個禮拜六返工，見平時着得斯斯文文嘅Carmen着晒背心短褲，襯金色綁帶高踭鞋，好有活力咁款，成班同事即刻嘩然吹晒口哨。
小妹貴為Carmen嘅閨中密友，見到佢咁都嚇咗一跳，唔通佢早排為情所傷，刺激過度？即刻走埋去慰問吓先，「約咗邊個咁高興呀？」個衰妹抬起頭望吓我，細細聲同我講話學緊跳舞，放工去上堂費事換衫先着成咁。嘩，跳舞着成咁？唔通跳艷舞？
Carmen話喎，早排有個澳洲朋友見佢情緒低落，介紹佢學鋼管舞，佢最初聽到好抗拒，覺得好似唔係好正經咁，半推半就跟個朋友上咗一堂，發現係全女班，啲同學個個都係良家婦女樣，個老師嘅身形成個健身教練咁款，三頭肌同二頭肌都好發達（Miss嚟㗎喎），跳起舞嚟非常sexy，喺支鋼管度飛嚟飛去，好輕盈。
Carmen聽住個老師講，stepbystep學，雖然冇老師跳得咁好，仲搞到隻腳瘀晒，但真係好enjoy好開心，跳完之後成個人鬆晒，乜嘢煩惱都忘記，不過，都唔平㗎，跳一個鐘成三百蚊。
逢周一至周四刊出