李司棋（大契）、關菊英（細契）同陳豪等一班《溏心風暴》嘅演員，噚日同譚詠麟（阿倫）、苗僑偉及張敬軒等到港台出席「第19屆TVAI-最佳節目頒獎禮」，張敬軒因為病所以戴口罩示人，仲俾司儀取笑念珠菌入喉嚨。
無綫去年大熱嘅劇集《溏心風暴》噚日喺頒獎禮上吐氣揚眉，喺電視節目欣賞指數調查中成為最佳電視節目獎第四位，打低咗好多資訊節目。而《向世界出發》就成為最佳電視節目獎第一位。
阿倫帶囝囝行善
大契對於《溏》劇再攞獎感到好開心，佢話：「因為冇預到再攞獎，而且今次唔係好多電視劇可以攞，所以好珍貴，不過因為近排拍嘢太緊密，所以都冇時間慶祝。」
陳豪對於之前被指係流感嘅源頭，噚日佢就大呼寃枉，話自己只係第一個病，但唔係源頭，強調自己係受害者，佢話：「不過個廠都有清潔，自己經過休息後都冇晒事。」
此外，阿倫早前到內地探訪受雪災影響嘅居民，佢話今次嘅經歷可以好好教育下一代，至於會唔會帶埋囝囝一齊去探訪，佢就話：「多謝關心，我幾年前已經帶過佢睇過，當時一齊派油畀老人家，有機會會再一齊去過。」
TVAI最佳節目頒獎禮部份得獎名單
評審團大獎
《南京說：大屠殺七十年：殤城記》（港台）
全年最高平均欣賞指數大獎：香港電台
最佳電視節目獎頭十位
1.向世界出發（無綫）
2.南京說：大屠殺七十年（港台）
3.最緊要正字（無綫）
4.溏心風暴（無綫）
5.星期二/日檔案（無綫）
6.新聞透視（無綫）
7.海底漫遊（港台）
8.傑出華人系列（港台）
9.鏗鏘集（港台）
10.有線新聞（有線）
資料來源：香港電台
