終審法院首席法官李國能噚日宣佈委任五個大狀做資深大律師，即係行內所謂Takesilk，五人分別係林雲浩、郭莎樂（CharlotteElizabethAnnDraycott）、李紹強、包華禮（MohanTarachandBharwaney）同AnthonyKennethHoughton。
五人中林雲浩Godfrey最後生，年僅39歲，佢93年獲大律師資格，擅長民事案，係小甜甜爭產案中，陳振聰星級律師團成員，舊年支持陳太參加補選。公職方面，佢現任高等法院規則委員會同公司法改革常務委員會成員。
郭莎樂現年50歲，係刑事案專家，05年佢同「金牙大狀」清洪拍檔打一單涉嫌貪污案時，首次指出廉署竊聽、偷拍查案手法或違《基本法》，結果觸發政府修例規管執法部門，獲已退休法官施允義讚揚。
其餘三個新晉資深大律師都年過50歲，李紹強係律政司上訴及禁毒政策協調組主管，多數負責刑事案；包華禮擅長打人身傷亡案件；AnthonyKennethHoughton比較多打建築、仲裁案件。五人資深大律師任命4月26號生效，同日舉行委任儀式。