賢賢噚日谷住道氣，小妹問佢乜嘢事？佢話啱啱同家人去咗荃灣悅來酒店食lunchbuffet，原本百零蚊都幾抵食。埋單時四個人食咗近六百蚊，作為精明消費者，check吓單至穩陣，點知發現張單無啦啦有項3蚊嘅收費。
3蚊？好濕碎啫，但究竟係乜嘢收費？賢賢話，佢係枱面左摷右摷菜牌，見到一張好細嘅心意卡（圖），打開睇入邊寫住每次惠顧都會喺賬單加收3蚊做慈善捐款，唔想捐，可以同服務員講。
賢賢話，佢由入座至埋單，啲職員都冇同佢講捐款事宜，你估個個客都會留意張心意卡咩。相信唔少人做咗善事都唔知；如果個客唔認同個受惠機構，矇查查sayno都冇機會。
咁又係噃？小妹噚日打電話畀悅來酒店公關問吓。佢開頭話張心意卡寫得好清楚，啲職員冇可能逐個客講。佢跟住又問小妹係咪會將佢講嘅嘢登出嚟，如果係要白字黑字問問題先算數喎，否則佢會全部否認之前所講嘅嘢。咁都得！小妹即管Fax問題去。之後公關回覆話，餐廳每張餐枱都擺放有關活動嘅宣傳卡，講清楚籌款嘅理念同細節兼受惠機構名稱。活動係自願參與，捐款與否由顧客決定。
消委會發言人話，酒店放張卡喺枱面就當客人同意，做法好有問題，因為唔係個個客都會攞張卡嚟睇，「職員一定要同客人講清楚。」
逢周一至周四刊出