警隊一哥鄧竟成早排就藝人淫照事件亂咁釋法，俾網民鬧到飛起，之後佢收到煲呔指示，唔再評論事件。沉寂咗一排之後，一哥終於回復信心，噚日踢完波後重新開腔講淫照，因為近排有網民喺美國網站再貼陳冠希淫照，特警成話香港警察都有留意呢件事，已經調查緊單嘢。至於查成點、會唔會拉人，特警成就學精咗，點都唔肯講。
向來熱愛足球嘅特警成噚日出席第三屆世界腎臟日活動，同一班醫生組成名人隊，挑戰明星足球隊，踢咗場友誼波。着住10號波衫嘅一哥打中場，仲射咗兩球波，不過一球高出，另一球就射斜咗，仲差啲省到觀眾。最後明星足球隊以2：1小勝名人隊。