唔少人追求巡航車排氣量的同時，是否真正需要一架那麼誇張的機車？事實上，平、靚，依然是大家的基本要求，但如果有架美觀、實用和經濟三項優勢兼備的巡航車，相信車迷的荷包也難逃一劫！KawasakiDrifter400正有齊以上所有優點。好奇怪，看着它我會想起樊少皇，大概是因為兩者也是較粗獷耐看，但內裏卻動靜皆宜吧！
撰文：周致中
攝影：譚盈傑
查詢：泰力摩托車中心（25122228）
原廠配件同級之冠
銀幕上的樊少皇，總給人正氣的感覺，功夫了得的他，原來也有文靜一面。「其實我都好鍾意玩音樂，𠵱家就同朋友合作搞一隊組合玩吓，寫吓歌咁，早陣子仲放咗上網，試吓啲口碑。雖然主打仍然係電影，但都想試吓唔同嘢。」有點猜不到，也像Drifter400，路人甲乙丙永遠看不出Drifter實質的排氣量是多少，雖然Drifter有400c.c.和800c.c.的級別之分，但兩者車長、大小卻是完全一樣，只是座位有別，前是雙座位，而後者是單座位，亦因前者排氣量較細，所以售價相應平得多。KawasakiDrifter400另一個特色是原廠配件，大型前沙擋、大型腳踏、全車絕對復古造型。大量電鍍配件也令其他車種難以匹敵。另一特點是「改」，無論大改或小改，當你對着Drifter400，唯一的問題是「唔知點改」？想將愛驅改裝，最大目的是令其座駕能獨一無二，Drifter400就唔同，就算唔改，也不易在道路上找到同款車種。
保持自我 獨一無二
在戲路上，少皇近年開始作出改變，少了一份忠直，卻多了一份滄桑感。「作為一個演員，某程度上係要多方面嘗試，以前唔係咁接受嗰啲反派或亦正亦邪的角色，但人大咗，心路歷程上會有一定嘅改變，始終唔想局限自己嘅戲路。」雖然動作仍是少皇的主打路線，但已不再拘泥於角色的形象。新作《葉問傳》，少皇就有全新的性格演繹，定給觀眾帶來新鮮感。雖然戲路有多少改變，但那份獨一無二的氣質，仍然存在。正如KawasakiDrifter一樣，就算在相同品牌內，也難找到與它一樣的氣質。外形上，它有點美國品牌「Indian」的影子？或許廠方的靈感也源於此。但實際上，Drifter還多了一份時代感，保持Kawasaki在機車界的獨特個性，在美學上而言，仍能超越同級對手。
真我個性 自由自在
「其實我對Chopper都好有Feel，始終Chopper畀人有種自由自在嘅感覺，尤其當你幻想喺外國嘅高速公路上自由飛馳，嗰種無拘無束、只專注喺駕駛上嘅感覺，真係幾Relax。雖然有時開私家車都係種享受，但電單車始終較直接，尤其開的是一架少人有、款式特別嘅車。某程度上，電單車畀人嘅感覺較危險，不過，佢獨有嘅個性，私家車始終比唔上。」少皇雖然不是百分百的電單車擁躉，但仍被Drifter400的獨特個性吸引。在低排氣量級別中有如此龐大身軀，選Drifter400的人，追求的肯定不是像Racing車般，在人群中一閃而過的速度感，而是希望惹人注目；不過廠方依然帶來兩個級別給車迷們選擇，照顧不同需要。說到底，Drifter的搶分元素是車形外觀，這點，應該無一機車迷會有異議。
