幾乎年年都有份喺《歡樂滿東華》卡拉之星環節勁歌熱舞嘅王俊棠，今個月23號會同拍拖多年嘅女友吳嘉莉（Susan）拉埋天窗。早排佢哋影咗結婚相，着住禮服嘅王俊棠除咗跪地作求婚狀外，又俾未來老婆扭耳仔，真係甫士多多。
王俊棠一向鍾意唱歌，馮仁昭日前同佢傾電話，問佢同Susan求婚嗰陣唱邊首冧歌時，王俊棠就話：「我日日都同佢唱情歌㗎啦，邊首最冧？你自己問佢啦！」
上海灘度蜜月
原本王俊棠想叫Susan同馮仁昭傾幾句，但Susan怕醜唔肯接受訪問，王俊棠就取笑未來老婆話：「怕醜就唔好結啦！」問佢哋打算去邊度度蜜月，王俊棠話：「邊有錢度蜜月吖，或者返內地幾日，去上海灘行吓咁囉。」講到生BB，王俊棠話自己好鍾意小朋友，最想生個女，所以結婚之後會同太太努力造人。