企業安排紅十字會人員到公司捐血就聽得多，但家陣時勢唔同，流感嚴重到人人自危，小學及幼稚園都要停課，打流感針最迫切，而且流感喺成人職場一樣橫掃唔少打工仔，大小企業大都發出咗內部指引，提醒員工要小心兼要上報病情，香港置業為咗防流感，仲專登安排醫護人員到公司幫員工打流感疫苗，不過呢個唔係免費，只係有優惠價。
所以噚日港置執董李志成（圖前右）「身先士卒」打流感針，又話公司已經喺內聯網度，不斷提醒員工要注意衛生，又提醒大家了解多啲流感知識同埋預防方法。
港置叫人到公司幫員工打疫苗唔止對員工有利，亦對公司有利。對員工嚟講，價錢平啲亦方便啲，對公司呢？若然一人感染，累到周邊嘅同事都被傳染，個個請假都好唔得掂，請病假嘅人少啲，公司嘅效率都高啲。