林嘉欣早前在台灣接拍了一部女同志版的《春光乍洩》，她在片中扮演花心TomBoy，分別與三位女演員有親熱咀嘴鏡頭。首次演女同志的嘉欣覺得最難適應是要紮胸演出，反而拍親熱戲越咀越輕鬆，她形容與女性接吻感覺有如食啫喱。
在今屆香港國際電影展中，林嘉欣有一部女同志電影《像花吃了那女孩》（CandyRain），該片以四段單元式電影拍攝，林嘉欣佔最後一段的戲份。片中嘉欣先後有三個女友，包括許安安、王心凌及路嘉欣。
嘴唇似啫喱
林嘉欣說：「我哋嘅親熱戲拍得好順利，大家好專業，我係第一次錫女仔，覺得女仔個嘴唇好柔軟，因為冇鬚根，好似啫喱咁。初時未拍大家都有啲擔心，不過一開機大家就好專業，今次係我一個新嘗試，我唔想俾人只係覺得我識做文藝片，其實呢部都係搞笑片。」
為了夠型，嘉欣不惜辛苦紮胸演出，她苦笑說：「雖然紮胸好辛苦，因為頭兩日我辛苦到頭暈，呼吸困難，不過紮咗胸真係感覺好唔同，可能冇咗女性嘅特徵，不過我同王心凌拍親嘴戲時，佢好尷尬，或者佢係歌手身份，要顧住形象，好似佢有一幕要用口咬我耳仔，佢唔敢咬，於是我要𠱁佢咬，為咗劇情需要我係冇所謂，所以我冇佢咁怕醜。」
嘉欣謂在戲中經常與女友大打出手，甚至打到流血才收手，她說：「我成日問助手我型唔型呀，因為我想吸引多啲女性觀眾，唔好將我定咗型，我都可以拍喜劇㗎。」
採訪：陳寶明