唉，呢排真係頭頭碰着黑，繼早排飛去美國出Trip病足咁多日之後，點知返到香港又有單麻煩嘢出現，真係激到我扎扎跳！
話說返到香港嗰晚約咗個Friend食飯，後來因為唔舒服食咗藥瞓過頭，惟有迫住揸車出去應約啦；點知當我揸車經過大埔公路去大埔嗰陣，突然前面有團好細好細嘅黑影飛過嚟，跟住車頭就好響咁啪咗一聲，初頭以為只係粒石仔打到車身先咁響，到後來接咗個Friend兼泊好部車之後，坐喺車頭嘅朋友突然好大聲咁問我部車塊大銀幕做咩黑咗一大點，聽到之後就梗係落車睇吓啦。
嘩！原來頭先嗰下啪一聲，原來係碎石打咗落大銀幕，所以裂咗些少之餘仲要差唔多爆到落底，咁樣搞一搞，換玻璃或者補玻璃又要使一筆。有時真係喺度諗，究竟係香港路面嘅清潔水準都仲係爭啲吖，定還是真係有咁多泥頭車跌啲泥頭石仔落嚟呢？不過，我淨係知道又要喺荷包拎錢出嚟換玻璃囉，唉……
記者：丹尼斯