上個星期六，唔少城中富豪及財經界名人喺中環聖約瑟教堂出現，都係為咗出席明嘉福嘅喪禮，送好友最後一程。出席喪禮嘅富豪包括擔任治喪委員會主席嘅超人李嘉誠、賭王何鴻燊、新世界發展冼為堅、華光船運趙世光、莊士集團（367）莊紹綏、銀河娛樂（027）呂志和等，但老友記四叔李兆基及彤叔鄭裕彤都因為避相冲而冇嚟。
明家水晶飛機悼念
彤叔同明嘉福好老友，但彤叔細佬之前過咗身，為免相冲佢先至冇出席，不過就以名下嘅公司送咗幾個花牌，包括新世界發展、利福國際（1212）同埋周大福，而彤叔個仔鄭家純間國際娛樂（8118）亦有送。
另一個同明嘉福份屬好友嘅四叔，因為呢個月生日，為免紅白相冲，亦都冇去。不過佢都好有心，同二仔李家誠分別用恒地（012）同李家誠夫婦名義送上花牌。
而其他送花牌嘅仲有邱德根、林建岳同林孝賢父子、殼王陳國強嘅德祥企業（372）、超人三父子同美高梅賭場等。
喪禮以天主教形式進行，明嘉福大仔明肇豐同記者講，爸爸生前嘅心願係造飛機，所以全家會掛個水晶飛機心口針紀念爸爸。成個儀式大約一個鐘，賭王同超人喺儀式完之前就走咗。